ប្រធានបទ
ដូចអ្នកដឹងស្រាប់ហើយ អំឡុងពេលពពោះ មិនស្រួលដូចពេលធម្មតាទេ សូម្បីតែអាហារយើងញ៉ាំ ភេសជ្ជៈយើងផឹក សុទ្ធតែអាចបង្កគ្រោះថ្នាក់ដល់បេប៊ីក្នុងផ្ទៃយើងគ្រប់ពេល។
ព្រោះអាហារដែលអ្នកញ៉ាំមានផ្ទុកជាតិពុល វានឹងបន្តឆ្លងទៅកាន់គភ៌ក្នុងផ្ទៃ ហេតុនេះអ្នកគួរស្វែងយល់ពីអាហារខាងក្រោមនេះ មិនគួរញ៉ាំពេលពពោះនោះឡើយ។
១- ជាតិអាល់កុល
នរណាក៏ដឹងដែរ ជាតិអាល់កុល គឺប៉ះពាល់ និងបង្កគ្រោះថ្នាក់ដល់គភ៌ក្នុងផ្ទៃប្រាកដមែន! ហេតុនេះទោះជាមានមិត្តភក្តិ ឬនរណាក៏ដោយអញ្ជើញអ្នកញ៉ាំសូម្បីមួយពែង ក៏មិនត្រូវផឹកដែរ។ បើទោះជាមកទល់នឹងពេលនេះ មិនទាន់មានការណែនាំជាក់លាក់ណាមួយពាក់ព័ន្ធរឿងផឹកជាតិអាល់កុលចំពោះអ្នកម្តាយកំពុងពពោះ ឬគេនិយាយតៗគ្នា ផឹកស្រាមួយកែវមិនប៉ះពាល់ក៏ដោយ ប៉ុន្តែយើងត្រូវចាំំថា ការសម្រេចចិត្តមិនញ៉ាំជាតិអាល់កុលអំឡុងពេលពពោះ គឺជារឿងល្អបំផុតសម្រាប់គភ៌ក្នុងផ្ទៃ។ ហេតុផលជាក់លាក់នាំឲ្យគេជឿថា អាល់កុលប៉ះពាល់កូនក្នុងផ្ទៃ គឺដោយសារអាល់កុលជាទម្រង់មួយនៃជាតិពុលម្យ៉ាងហៅថា Cytotoxin ដែលអាចវាយប្រហារខួរក្បាល និងកោសិកាសរសៃប្រសាទគភ៌អំឡុងពេលស្ថិតក្នុងពោះម៉ាក់ៗ។
២- ជាតិនីកូទីន
រឿងនេះអាចជាការពិបាកខ្លាំង ប៉ុន្តែអ្នកម្តាយច្រើនណាស់ អាចផ្តាច់ទម្លាប់អាក្រក់របស់ខ្លួនបានអំឡុងពេលពពោះ ពិសេសរឿងជក់បារីតែម្តង។ ត្រូវចាំថា បើអ្នកជក់បារីពេលពពោះ កូននៅក្នុងផ្ទៃក៏ជាអ្នកជក់បារីដូចគ្នា។ មួយនេះ បើអ្នកអាចចៀសវាងបារី ជាតិនីកូទីនបាន ក៏ជាឱកាសល្អជួយយើងអាចផ្តាច់បារី ឬក្លាយជាអ្នកមិនជក់បារី ហើយកូនកើតមកក៏មិនជក់បារីដែរ។
៣- ផលិតផលពីទឹកដោះគោ និងស៊ុត
អ្នកម្តាយកំពុងពពោះទាំងអស់ គួរតែចៀសឲ្យឆ្ងាយពីផលិតផលណា ផលិតពីទឹកគោឆៅ តាមអាចធ្វើបាន ព្រោះផលិតផលទាំងនោះ អាចនឹងមានផ្ទុកពពួកបាក់តេរីក្នុងអាហារ ហៅថា Listeria អាចបង្កឲ្យយើងពុលបាន។ ត្រូវប្រាកដថា ជាការប្រុងប្រយ័ត្ន នៅពេលអ្នកទិញទំនិញ ត្រូវតែសួរនាំ ឬពិនិត្យលើកញ្ចប់ផលិតផលឲ្យច្បាស់ "ជាផលិតផលពីទឹកដោះគោឆៅ" ឬអត់។ ផលិតផលយើងគួរចៀសវាង មានដូចជា ឈីសទន់ បើទោះជាយើងធ្លាប់គិតថា គេបានសម្លាប់មេរោគដោយកម្តៅក្តី ក៏ដូចជា ឈីសខៀវ និងឈីសផ្ទៃខាងលើមានសភាពរអិលជាដើម។ ចំពោះឈីសរឹងពណ៌លឿង ផលិតពីទឹកដោះគោដែលសម្លាប់មេរោគដោយកម្តៅ ទោះមើលទៅមិនបង្កគ្រោះក៏ដោយ ប៉ុន្តែអ្នកក៏គួរតែកាត់ផ្នែករឹងខាងក្រៅចេញមុននឹងញ៉ាំ។ ទឹកដោះគោឆៅ និងស៊ុតចម្អិនមិនឆ្អិនល្អ ទាំងបង្អែម ទឹកជ្រលក់ ឬក៏នំខេក ក៏គួរតែចៀសវាងដូចគ្នា។ អ្វីជា Listeria?
Listeria គឺជាទម្រង់ការពុលអាហារបង្កឡើងដោយពពួកបាក់តេរី Listeria។ ទោះជា រោគសញ្ញាពុលអាហារដោយពពួកបាក់តេរីនេះ គ្រាន់តែអាចបណ្តាលឲ្យស្រីៗពពោះ មានអាការៈគ្រុនក្តៅ ដូចគ្នាទៅនឹងរោគសញ្ញាផ្តាសាយ ហើយក៏អាចឆ្លងទៅកាន់គភ៌ក្នុងផ្ទៃតាមរយៈទងសុក។ យ៉ាងណា ក្នុងករណីធ្ងន់ធ្ងរ គឺអាចបណ្តាលឲ្យសម្រាលមុនខែ ឬកូនស្លាប់ក្នុងផ្ទៃទៀតផង។
៤- សាច់ឆៅ និងសាច់ក្រក
អ្នកម្តាយកំពុងពពោះទាំង ត្រូវចៀសវាងញ៉ាំសាច់សត្វឆៅ។ អ្នកម្តាយមានដឹងថា ហេតុអ្វីអ្នកត្រូវចៀសវាងញ៉ាំសាច់ឆៅដែរទេ? គឺព្រោះថា វាអាចបង្កឲ្យអ្នកឆ្លងមេរោគតាមអាហារបាន។ ផលិតផល បញ្ចូលទាំងសាច់សុទ្ធ សាច់ត្រី ស៊ុត និងផលិតផលពីទឹកដោះគោឆៅ គឺជាកន្លែងប្រមូលផ្តុំទៅដោយពពួកបាក់តេរី និងប៉ារ៉ាស៊ីត ពិសេសបាក់តេរី Listeria ដែលអាចចម្លងបាក់តេរីចូលក្នុងខ្លួនយើង បង្កឲ្យមានផលវិបាកផ្សេងៗ។ លើសពីនេះ បាក់តេរី និងប៉ារ៉ាស៊ីតទាំងនោះ អាចធ្វើឲ្យរាំងស្ទះដល់បម្រែបម្រួលអ័រម៉ូនអំឡុងពេលពពោះ ប៉ះពាល់ដល់ប្រព័ន្ធភាពស៊ាំក្នុងរាងកាយ ធ្វើឲ្យអ្នកប្រឈមឆ្លងបាត់តេរី Listeria កាន់តែខ្ពស់។
អ្នកក៏ត្រូវប្រាកដថា មិនត្រូវញ៉ាំច្រើនហួសហេតុ ពិសេសពពួកសាច់មានផ្ទុកវីតាមីន A ច្រើនលើសលុបនោះ ព្រោះមានអ្នកម្តាយមានបញ្ហាលើសជាតិវីតាមីន A អំឡុងពេលពពោះ នឹងនាំឲ្យគភ៌ក្នុងផ្ទៃលូតលាស់យឺតយ៉ាវ នាំឲ្យមានបញ្ហាស្បែក សួត និងផ្នែកថែមទៀតផង។ សាច់គ្រប់ប្រភេទ អ្នកអាចញ៉ាំដោយសុវត្ថិភាព គឺលុះត្រាតែបានចម្អិនត្រូវត្រឹម ហើយត្រូវចាំថា កុំញ៉ាំសាច់ដែលចម្អិនមិនឆ្អិនដូចជា ស្តេក សាច់ជ្រូកចិញ្ច្រាំ គោដុត ភ្លៅជ្រូកអាំង ឬសាច់ក្រកជាដើម។ នៅពេលអ្នកញ៉ាំអាហារសាច់ចម្អិនមិនឆ្អិនល្អ អាចនាំឲ្យអ្នកកើតជំងឺផ្សេងៗ ដែលបណ្តាលមកពីពពួកប៉ារ៉ាស៊ីត និងគម្រាមកំហែងដល់សុខភាពគភ៌ ពិសេសអំឡុងពេល ៣ ខែដំបូងនៃការពពោះ។ មានតែលក្ខខណ្ឌឆ្លងមេរោគមុនពេលពពោះប៉ុណ្ណោះ ដែលអាចជួយការពារប្រព័ន្ធភាពឮស៊ាំរបស់គភ៌ក្នុងផ្ទៃបាន។ ទោះជាយ៉ាងនេះក្តី អ្នកក៏មិនគួរប្រថុយញ៉ាំសាច់ចម្អិនឆ្អិនល្អអំឡុងពេលពពោះនោះដែរ។
៥- ភេសជ្ជៈ
កាហ្វេ តែខ្មៅ និងភេសជ្ជៈមានជាតិកាហ្វេអ៊ីន ដូចជាកូកាកូឡា សុទ្ធតែត្រូវអនុញ្ញាតឲ្យអ្នកញ៉ាំអំឡុងពេលពពោះ ប៉ុន្តែត្រឹមមានកម្រិត (កាហ្វេ ២-៣ ពែង/ថ្ងៃ)។ តែខ្មៅ និងតែបៃតង ក៏មានផ្ទុកជាតិកាហ្វេអ៊ីន និងជាតិតានីន ដែលធ្វើឲ្យការស្រូបយកជាដែកចូលរាងកាយមិនបានល្អ។ អ្វីល្អបំផុតសម្រាប់អ្នកម្តាយកំពុងពពោះ ត្រូវចៀសឲ្យឆ្ងាយពីភេសជ្ជៈទាំងនេះ។
៦- បន្លែ ផ្លែឈើ និងសាលាដ
អាហារបន្លែស្រស់ មិនបានចម្អិនត្រឹមត្រូវ មិនគួរញ៉ាំនោះឡើយ ព្រោះដើម្បីការពារអ្នកពីការឆ្លងបាក់តេរី ឬមេរោគមានក្នុងបន្លែទាំងនោះ។
បញ្ជាក់៖ រាល់ព័ត៌មានដែលវេបសាយយើងចេញផ្សាយដើម្បីចែករំលែកចំណេះដឹងប៉ុណ្ណោះ ហើយព័ត៌មានទាំងនោះ មិនអាចជំនួសដំបូន្មានពីពេទ្យជំនាញ ចំពោះស្ថានភាពសុខភាពជាក់ស្ដែងរបស់អ្នកជំងឺឡើយ។ ដូច្នេះមិនត្រូវបោះបង់ មិនស្ដាប់ដំបូន្មាន ពន្យារពេល ឬមិនទៅជួបពិគ្រោះយោបល់ជាមួយគ្រូពេទ្យ ដោយសារអ្នកបានអានព័ត៌មានណាមួយលើវេបសាយនេះឡើយ។ រាល់ពេលចាប់ផ្ដើមវិធីសាស្ត្រព្យាបាលណាមួយ ត្រូវប្រាកដថា បានពិគ្រោះ និងទទួលការអនុញ្ញាតពីគ្រូពេទ្យជំនាញ៕